ᓇᓗᓇᐃᖅᓯᒍᑏᑦ ᒪᓕᑦᑕᐅᒋᐊᓕᓐᓂᒃ

ᐅᓄᕐᓂᖏᑕ ᖃᐅᔨᓴᖅᑕᐅᓂᖏᑦ ᖃᓕᕋᓖᑦ (Reinhardtius hippoglossoides) 2019−ᒥ

ᐊᕕᑦᑐᖅᓯᒪᔪᓂ ᐱᓕᕆᖃᑎᒌᑦᑐᐃᑦ ᕿᒥᕐᕈᒋᐊᕐᓂᖓᑦ − ᕿᑎᖅᐸᓯᐊᓂ ᐊᒻᒪᓗ ᐅᑭᐅᖅᑕᖅᑐᒥ ᓄᓇᒋᔭᐅᔪᒥ

ᓄᕕᐱᕆ 25–27, 2019
ᐸᓐᓂᖅᑑᖅ, ᓄᓇᕗᑦ

ᐃᑦᓯᕙᐅᑕᕆᔭᐅᔪᖅ: ᑯᕆᔅ ᓘᐃᔅ (Chris Lewis)

ᐃᓗᓕᖏᑦ

ᖃᓕᕋᓖᑦ ᐸᓐᓂᖅᑑᑉ ᐃᒪᕕᖓᑕ ᖃᓕᕋᓕᓐᓂᒃ ᐊᐅᓚᑦᓯᕕᐅᔪᖅ (CSTMA) ᐃᓱᒪᒋᔭᐅᔪᑦ ᐃᒻᒥᒃᑰᖓᒋᐊᖏᑦ ᐱᔭᐅᕙᑦᑐᓂ ᓴᓐᓂᕈᑎᐅᑉ ᐃᒪᕕᖓᓂ, ᒪᓕᔅᓱᒋᑦ ᓯᕗᓂᐊᒍᑦ ᓂᕕᖓᑖᖏᑦᑎᒍᑦ ᖃᐅᔨᓴᖅᑕᐅᒍᑎᕕᓃᑦ ᓇᓗᓇᐃᖅᓯᓯᒪᓪᓗᑎᑦ ᐱᕈᕇᖅᓯᒪᓂᖏᑦ ᐸᓐᓂᖅᑑᑉ ᐃᒪᕕᖓᓂ ᓇᔪᖅᐸᒋᐊᖏᑦ, ᑕᐃᒪᐃᒻᒪᓗ ᐃᒻᒥᒃᑰᖓᔪᑦ ᐃᓚᒋᔭᐅᙱᓐᓇᒥᑦ ᕿᑐᕐᖏᐅᕐᕕᐅᔪᓂ ᐱᓯᒪᔪᓂ. ᓱᖅᑯᐃᖅᑕᐅᓚᐅᖅᓯᒪᙱᑦᑐᖅ ᖃᓕᕋᓖᑦ ᕿᑐᕐᖏᐅᖅᐸᒻᒪᖔᑕ ᐸᓐᓂᖅᑑᑉ ᐃᒪᕕᖓᓂ. ᒫᓐᓇᒃᑯᑦ ᓇᓚᐅᑦᓵᖅᓯᒪᒻᒪᑕ ᐸᓐᓂᖅᑑᑉ ᐃᒪᕕᖓᓃᑦᑐᐃᑦ ᓅᖃᑦᑕᕐᒪᑕ ᑕᒪᐅᙵ ᐱᕈᕇᓚᐅᕋᑎᑦ ᖃᓕᕋᓖᑦ ᓴᓐᓂᕈᑎᐅᑉ ᐃᒪᖓᓐᓂ ᖃᐅᔨᓴᖅᑕᐅᒋᐊᖃᓚᐅᖅᑐᐃᑦ. ᐱᒋᐊᖅᓱᒍ 2010 ᓅᖃᑦᑕᕐᓂᖏᑦ ᖃᓕᕋᓖᑦ ᐸᓐᓂᖅᑑᑉ ᐃᒪᕕᖓᓂ, ᐸᓐᓂᖅᑑᓪᓗ ᐃᒪᕕᖓᑕ ᐊᕙᑎᖏᑦ, ᖃᐅᔨᓴᖅᑕᐅᓯᒪᓕᖅᑐᑦ ᐊᐅᖅᑐᓱᑦ ᓂᐱᓂᒃ ᖃᐅᔨᓴᐅᑎᓂᒃ. ᐅᓄᕐᓂᖏᑦ ᖃᐅᔨᓴᖅᑕᐅᓂᖏᑦ ᑲᔪᓰᓐᓇᖅᑐᑦ (ᐆᑑᑎᒋᓗᒋᑦ, ᐃᒪᕐᒥᐅᑕᓕᕆᔨᕐᔪᐊᒃᑯᒃ MPO 2014, ᐅᐊᓐᓇᖓᓂ ᐊᑦᓛᓐᑎᒃ ᐃᖃᓗᓕᕆᔩᑦ ᑲᑎᔾᔨᖃᑎᒌᑦ Northwest Atlantic Fisheries Organization). ᑭᓯᐊᓂᓕ, ᖃᐅᔨᓴᖅᑕᐅᓚᐅᖅᓯᒪᙱᑦᑐᑦ ᖃᓕᕋᓖᑦ ᐸᓐᓂᖅᑑᑉ ᐃᒪᕕᖓᓂ. ᑲᑎᓕᒫᕐᓗᒋᑦ ᖃᓕᕋᓕᖅᑕᐅᒍᓐᓇᖅᑐᐃᑦ ᒪᓕᑉᐸᑦᑐᑦ ᐊᖏᓂᖅᐹᕆᒍᓐᓇᖅᑎᖏᓐᓂ ᐱᔭᐅᒍᓐᓇᖅᑐᐃᑦ ᐅᓂᒃᑲᐅᑎᐅᓯᒪᔪᑦ ᑕᐃᑦᓱᒪᓂᕐᓂᑕᐃᑦ ᐊᒥᓲᓂᖅᐸᐅᑎᓪᓗᒋᑦ ᐅᑭᐅᒃᑯᑦ ᓯᑯᖃᓕᖅᑎᓪᓗᒍ ᐃᖃᓗᓐᓂᐊᕈᑎ ᐊᑐᖅᑕᐅᕙᓚᐅᖅᑐᑦ ᐊᕐᕌᒍᖏᑦ 1990 ᐊᑐᖅᑎᓪᓗᒋᑦ ᑕᐃᑦᓱᒪᓂ ᒥᑦᓵᓃᑦᑐᑦ 115 ᐃᖃᓗᒐᓱᐊᖅᑏᑦ ᐃᓚᐅᖃᑦᑕᓚᐅᖅᑎᓪᓗᒋᑦ ᖃᓕᕋᓕᓐᓂᐊᕐᓂᕐᒥ ᐅᖁᒪᐃᓐᓂᖃᖅᑐᓂ 400 ᑕᓐᔅ ᐊᕐᕌᒍᑕᒫᑦ ᐱᖃᑦᑕᓚᐅᖅᑎᓪᓗᒋᑦ ᐊᕐᕌᒍᐃᑦ ᐱᖓᓱᐃᑦ ᐊᑐᖅᑎᓪᓗᒋᑦ. ᖃᐅᔨᒪᔭᐅᙱᑦᑐᑦ ᐃᓘᓐᓈᒍᑦ ᐱᔭᐅᒍᓐᓇᖅᑐᓕᒫᑦ 500 ᑕᓐᔅ ᑲᑎᓕᒫᕐᓗᒋᑦ ᐸᓐᓂᖅᑑᑉ ᐃᒪᕕᖓᓂ ᐊᓐᓇᐅᒪᒍᓐᓇᕋᔭᕐᒪᖔᑕ ᐊᑦᑕᓇᖅᑐᒦᙱᓪᓗᑎᑦ ᐃᓄᐃᓴᓪᓕᕙᓪᓕᐊᑐᐃᓐᓇᕆᐊᖃᕐᒪᑕ.

ᐅᑭᐅᖓᓂ 2018, ᐸᓐᓂᖅᑑᑉ ᐃᒪᕕᖓᓂ ᐃᖃᓗᒐᓱᐊᖅᑏᑦ ᖃᓕᕋᓕᓚᐅᖅᑐᑦ ᐊᑕᖏᖅᓱᒋᑦ 500 ᑕᓐᔅ ᐅᖁᒪᐃᓐᓂᓕᓐᓂᑦ ᑰᑕᖓᑦ ᑎᑭᐅᑎᔭᐅᒋᐅᖅᓱᓂ ᓯᕗᓪᓕᖅᐹᒥ ᐃᖃᓗᒐᓱᐊᖃᑦᑕᓯᓚᐅᖅᓯᒪᒻᒪᑕᓂᒃ ᑕᐃᒫᑦᓴᐃᓐᓇᒐᓚᓪᓗ ᓇᓗᓇᐃᓚᐅᕆᓪᓗᑎᑦ 2019 ᖃᓕᕋᓖᑦ ᐱᔭᐅᔪᒥᓃᑦ ᐅᑭᐅᖓᓂ ᐃᖃᓗᓐᓂᐊᕐᓇᐅᑉ. ᐸᓐᓂᖅᑑᕐᒥ ᐃᖃᓗᓕᕆᔩᑦ ᓇᒻᒥᓂᖓᑦ ᑐᑦᓯᕋᓚᐅᖅᑐᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ ᐊᐅᒡᒍᓯ 2017−ᒥ, ᐃᖃᓗᓐᓂᐊᕐᓂᖅ ᐱᒋᐊᓚᐅᖅᑎᓐᓇᒍ, ᐊᖏᓪᓕᒋᐊᖅᑕᐅᖁᔨᓪᓗᑎᑦ ᑰᑕᐅᔪᒥᒃ 500 ᑕᓐᔅ−ᒥᒃ 1000 ᑕᓐᔅ−ᒧᑦ. ᑖᑦᓱᒥᖓᑦᓴᐃᓐᓇᖅ ᑐᑦᓯᕋᐅᑎᖃᒃᑲᓐᓂᓚᐅᕐᒥᔪᑦ ᖄᒃᑲᓐᓂᐊᒍᑦ 50-100 ᑕᓐᔅ−ᓂᒃ ᐱᒃᑲᓐᓂᕈᒪᓪᓗᑎᑦ 2018 ᖃᓕᕋᓕᓐᓂᐊᕐᓂᕐᒧᑦ. ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᖏᓚᐅᙱᑦᑐᑦ ᑐᑦᓯᕋᐅᑎᖓᓐᓂᒃ, ᐅᖃᐅᓯᖃᖅᓱᑎᑦ ᐅᓄᕐᓂᖏᑦ ᖃᐅᔨᓴᖅᑕᐅᓚᐅᖅᓯᒪᙱᒋᐊᖏᑦ ᓇᓕᖅᑲᖅᑕᖃᕋᓂᓪᓗ ᖃᐅᔨᓴᐅᑎᕕᓂᐅᔪᓂᒃ ᖁᕝᕙᕆᐊᕆᒍᑕᐅᒍᓐᓇᖅᑐᓂᒃ ᑐᑦᓯᕋᐅᑎᖓᓐᓂᒃ. ᒫᑦᓯ 2019-ᒥ, ᐸᓐᓂᖅᑑᑉ ᐃᖃᓗᓕᕆᔨᖏᑦᑕ ᓇᒻᒥᓂᖓᑦ ᑐᑦᓯᕋᐅᑎᓕᐅᒃᑲᓐᓂᓚᐅᕐᒥᔪᑦ ᖄᒃᑲᓐᓂᐊᒍᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᐊᖏᓪᓕᒋᐊᖁᔨᓪᓗᑎᑦ ᑰᑕᒥᒃ 300 ᑕᓐᔅ−ᓂᒃ. ᑕᒪᓐᓇ ᐊᐅᓚᔾᔭᐃᓚᐅᖅᑐᖅ ᐃᒪᕐᒥᐅᑕᓕᕆᔨᕐᔪᐊᒃᑯᓐᓂᒃ ᐊᐅᓚᑦᓯᔨᖏᓐᓂᒃ ᑐᑦᓯᕋᖅᑎᑦᓯᓪᓗᑎᑦ ᖃᐅᔨᓴᕈᑎᓅᖓᔪᓂᒃ ᐅᖃᐅᔾᔨᒋᐊᕐᕕᐅᓪᓗᑎᑦ ᐊᓐᓇᐅᒪᒍᓐᓇᕋᔭᕐᒪᖔᑕ 500 ᑕᓐᔅ, 700 ᑕᓐᔅ, ᐅᕝᕙᓘᓐᓃᑦ 800 ᑕᓐᔅ−ᓂᒃ ᐅᖁᒪᐃᓐᓂᖃᖅᑐᓂᒃ ᑲᑎᓕᒫᕐᓗᒋᑦ ᖃᓕᕋᓕᒍᓐᓇᕐᒪᖔᑕ ᐸᓐᓂᖅᑑᑉ ᐃᒪᕕᖓᓃᑦᑐᓂᒃ.

ᐃᓚᒋᐊᕈᑎᒋᓗᒍ, ᐃᓚᖏᑦ ᑲᓇᑕᒥ ᐃᖃᓗᒐᓱᐊᖅᑏᑦ ᐱᒍᓐᓇᖅᑎᑕᐅᓲᖑᓪᓗᑎᑦ ᐱᔭᐅᙱᑦᑐᕕᓂᕐᓂᒃ ᐊᕐᕌᓂᐅᓚᐅᖅᑐᑦ ᐱᔭᐅᒍᓐᓇᖅᑎᑦᓯᓪᓗᑎᑦ ᑐᖏᓕᐊᓄᑦ ᐊᕐᕌᒍᖓᓄᑦ, ᓇᓗᓇᐃᖅᓯᒪᒐᔪᑦᑐᑦ ᐊᐳᖅᑕᕐᕕᑦᓴᖏᑦ. 2018-ᒥ, ᐊᑐᖅᑕᐅᓗᐊᕋᔪᐃᑦᑐᒥ, ᐃᒪᕐᒥᐅᑕᓕᕆᔨᕐᔪᐊᒃᑯᑦ ᐱᒍᓐᓇᖅᑎᑦᓯᓚᐅᖅᑐᑦ ᐱᔭᐅᙱᑦᑐᕕᓂᕐᓂᒃ 50 ᑕᓐᔅ−ᓂᒃ ᐊᕐᕌᒍᖓᓐᓂ 2017 ᐸᓐᓂᖅᑑᑉ ᐃᒪᕕᖓᓂ ᐃᑲᔪᖅᓯᒍᑎᐅᓗᓂ 2018−ᒥ ᖃᓕᕋᓕᒐᓱᐊᕐᓇᖅ ᒪᑐᐃᖓᓂᖓᓂ. ᐱᕙᓪᓕᐊᓂᖓ ᐱᔭᐅᙱᑦᑐᕕᓃᑦ ᐱᔭᐅᒍᓐᓇᕐᓗᑎᑦ ᐊᑐᐊᒐᖅ ᐸᓐᓂᖅᑑᑉ ᐃᒪᕕᖓᓂ ᐃᖃᓗᓐᓂᐊᖅᑎᓄᑦ ᐱᕕᑦᓴᖃᖅᑎᑦᓯᒐᔭᖅᑐᑦ ᐃᖃᓗᓕᕆᔩᑦ ᐊᐅᓚᑦᓯᔨᖏᓐᓂᒃ ᖃᓄᖅᑑᕈᑎᑦᓴᓂᒃ. ᑭᓯᐊᓂᓕ, ᐊᑦᑐᐃᓂᖃᕈᓐᓇᕐᓂᖓ ᐱᔭᐅᙱᑦᑐᕕᓃᑦ ᐊᕐᕌᒎᓚᐅᖅᑐᒥ ᐱᔭᐅᒍᓐᓇᓕᕐᓗᑎᑦ, ᐃᓚᒋᔭᐅᒋᐊᖃᕐᒥᔪᑦ ᐃᓱᒪᒋᔭᐅᓗᑎᑦ ᐊᑦᑐᐃᓂᖃᕈᓐᓇᕐᓂᖏᑦ ᐊᓪᓗᖅᑎᑕᐅᒍᓐᓇᖅᐸᑕ ᐱᔭᐅᙱᑦᑐᒥᓃᑦ ᑭᓪᓕᖃᕈᓐᓇᕐᓂᖏᑦ (ᐆᑦᑑᑎᒋᓗᒍ, ᐊᖏᓂᖅᐹᕆᒍᓐᓇᖅᑕᖓ ᑲᑎᓕᒫᕐᓗᒋᑦ ᖃᓕᕋᓕᑦᑕᐅᒍᓐᓇᖅᑐᐃᑦ ᐊᓪᓗᖅᑎᑕᐅᒍᓐᓇᖅᐸᑕ ᖃᓄᑎᒋ ᐊᕐᕌᒍᐃᑦ ᐅᑎᕆᐊᕐᕕᐅᒍᓐᓇᖅᑲᑦ ᐱᔭᐅᙱᓐᓂᑯᓄᑦ), ᑕᒪᓐᓇ ᖃᐅᔨᓴᖅᑕᐅᒋᐊᓕ ᐊᒻᒪᓗ ᖃᐅᔨᓴᕐᓂᕐᒧᑦ ᐅᖃᐅᔾᔨᒋᐊᖅᑕᐅᓂᖅ ᐃᓱᒪᒋᔭᐅᒋᐊᖃᕐᒥᔪᖅ.

ᑎᑭᑕᐅᒐᓱᐊᖅᑐᑦ

ᒪᑯᐊ ᑎᑭᑕᐅᒐᓱᐊᖅᑐᖅᑦ ᐅᖃᐅᓯᐅᓂᐊᖅᑐᑦ ᐊᕕᑦᑐᖅᓯᒪᔪᓂ ᐱᓕᕆᖃᑎᒌᑦᑐᐃᑦ ᑲᑎᒪᓕᖅᐸᑕ:

1. ᓇᓗᓇᐃᕐᓗᒋᑦ ᖃᓄᐃᓐᓂᖏᑦ ᐊᒻᒪᓗ ᐊᓯᔾᔨᑕᕐᓂᖏᑦ ᐸᓐᓂᖅᑑᑉ ᐃᒪᕕᖓᓂ ᐅᓄᕐᓂᖏᑕ.
2. ᖃᐅᔨᓴᖅᑕᐅᓗᓂ ᐊᓐᓇᐅᒪᒍᓐᓇᕐᓂᖏᑦ (ᐆᑦᑑᑎᒋᓗᒍ, ᐊᑦᑕᓇᖅᑐᒦᒍᓐᓇᕐᓂᖏᑦ ᐃᓄᐃᓴᓪᓕᓗᐊᕐᓂᕐᒧᑦ) ᐱᔾᔪᑎᖃᕐᓗᑎᑦ ᑲᑎᓕᒫᕐᓗᒋᑦ ᖃᓕᕋᓕᑦᑕᐅᒍᓐᓇᖅᑐᐃᑦ ᐅᖁᒪᐃᓐᓂᖃᕐᓗᑎᑦ 500 ᑕᓐᔅ, 700 ᑕᓐᔅ ᐊᒻᒪᓗ 800 ᑕᓐᔅᔭ
3. ᓇᓗᓇᐃᖅᑕᐅᓗᑎᑦ ᓇᒧᑦ ᓅᖃᑦᑕᕐᓂᖏᑦ ᐃᓗᐊᓂ ᐸᓐᓂᖅᑑᑉ ᐃᒪᕕᖓᑕ ᐊᒻᒪᓗ ᖃᐅᔨᓴᖅᑕᐅᓗᑎᑦ ᐊᑦᑐᐊᓂᖏᑦ ᓴᓐᓂᕈᑎᐅᑉ ᐃᒪᖓᓐᓃᑦᑐᓄᑦ ᐊᒻᒪᓗ ᐸᓐᓂᖅᑑᑉ ᐃᒪᕕᖓᓃᑦᑐᐃᑦ.
4. ᖃᐅᔨᓴᖅᑕᐅᓗᑎᑦ ᐊᓐᓇᐅᒪᒍᓐᓇᕐᓂᖏᑦ ᐱᔭᐅᙱᓐᓂᑯᐃᑦ ᓂᖏᖅᑕᐅᒍᓐᓇᖅᐸᑕ ᑲᑎᓕᒫᕐᓗᒋᑦ ᖃᓕᕋᓕᑦᑕᐅᒍᓐᓇᖅᑐᓄᑦ ᐊᕐᕌᒍᐃᑦ ᐊᑕᐅᓯᕐᓗ ᑕᓪᓕᒪᐃᓪᓗ ᐃᓗᐊᓂ.

ᑎᑎᕋᐅᑎᐅᓯᒪᔪᑦ

• ᖃᐅᔨᓴᕐᓂᕐᒧᑦ ᐅᖃᐅᔾᔨᒋᐊᕐᓂᖅ ᐅᓂᒃᑳᓕᐊᖅ
• ᑲᑎᒪᐅᑎᕕᓃᑦ
• ᖃᐅᔨᓴᕐᓂᕐᓄᑦ ᐸᐃᑉᐹᖁᑏᑦ

ᓂᕆᐅᒋᔭᐅᔪᑦ ᐃᓚᐅᓂᐊᕐᓂᖏᓐᓂ

• ᐃᒪᕐᒥᐅᑕᓕᕆᔨᕐᔪᐊᒃᑯᑦ ᑲᓇᑕᒥ (ᖃᐅᔨᓴᕐᓂᕐᒧᑦ ᐊᑐᐃᓐᓇᖃᕐᓂᕐᒧᓪᓗ ᐊᐅᓚᑦᓯᔨᖏᑦ)
• ᒐᕙᒪᒃᑯᖏᑦ ᓄᓇᕗᑦ, ᐊᕙᑎᓕᕆᔨᒃᑯᒃ, ᐃᖃᓗᓕᕆᔨᒃᑯᒃ ᓇᑦᓯᓕᕆᔨᒃᑯᓪᓗ
• ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ
• ᕿᑭᖅᑖᓗᒻᒥ ᐆᒪᔪᓕᕆᔨᒃᑯᑦ ᑲᑎᒪᔨᖏᑦ
• ᐸᓐᓂᖅᑑᒥ ᐆᒪᔪᕐᓂᐊᖅᑏᑦ ᑲᑎᒪᔨᖏᑦ
• ᐸᓐᓂᖅᑑᒥ ᐃᒪᕕᖓᓂ ᐃᖃᓗᓐᓂᐊᖅᑏᑦ ᓇᒻᒥᓂᖓᑦ/ᐸᓐᓂᖅᑑᒥ ᐃᖃᓗᓕᕆᔩᑦ ᐱᓕᕆᖃᑎᒌᑦᑐᑦ
• ᐃᓕᓐᓂᐊᖅᓯᒪᔪᒻᒪᕇᑦ
• ᐊᓯᖏᑦ ᖃᐃᖅᑯᔭᐅᓯᒪᔪᑦ ᖃᐅᔨᒪᔪᒻᒪᕇᑦ